Descartes pesqueiros

Jose Manuel Balseiro preguntará á Conselleira do Medio Rural e do Mar no vindeiro pleno do Parlamento de Galicia sobre o acordo adoptado pola Eurocámara

O GRUPO POPULAR AMOSA A SÚA OPOSICIÓN AO INFORME DO PARLAMENTO EUROPEO QUE PROPÓN PROHIBIR OS DESCARTES PESQUEIROS E LAMENTA A FALTA DE APOIO DO PSOE Á FLOTA GALEGA

 Pesca

  • O voceiro do Mar asegura que só o Partido Popular Europeo é  sensible aos problemas que unha reforma errada da normativa comunitaria pode crear ao sector pesqueiro

 

Santiago, 26 de febreiro de 2013.- O voceiro do Mar do Grupo Parlamentario Popular, Jose Manuel Balseiro, amosou a súa rotunda oposición ante o informe aprobado polo Parlamento Europeo e no que se propón prohibir os descartes no ámbito pesqueiro. A Eurocámara quere obrigar a desembarcar todas as capturas en porto aplicando un calendario moi restritivo que comezaría a contar no ano próximo e que suporía consagrar a política de descartes cero antes do ano 2016. Coa nova proposta as capturas que entraron na rede aínda que a embarcación non tiña permiso ou interés para pescar esas especies terían que descontarse da cota aínda dispoñible.

 Ante a relevancia desta decisión, que aínda non é definitiva, o parlamentario galego rexistrou unha pregunta dirixida á Conselleira do Medio Rural e do Mar e que será obxecto de análise no vindeiro pleno do Parlamento de Galicia, a través da que busca coñecer a opinión da Xunta sobre o acordo adoptado pola Eurocámara.

 Balseiro xa adiantou que en opinión do Grupo Popular o acordo do Parlamento europeo tal e como está formulado é moi prexudicial para o sector pesqueiro galego e sinala que “pon en jaque a unhas 150 embarcacións galegas, que se corresponden coas que realizan pesquerías mixtas tanto no caladoiro nacional como en augas comunitarias”.

 EMENDA DO GRUPO POPULAR

 “Concordamos co compromiso de acabar progresivamente cos descartes pesqueiros, pero queriamos facelo dunha forma flexible e non de xeito inmediato, para non comprometer a viabilidade da flota”-dixo Jose Manuel Balseiro

 O voceiro do Mar asegura que só o Partido Popular Europeo é  sensible aos problemas que a reforma da lexislación comunitaria pode crear ao sector pesqueiro e non dubidou en reprochar aos socialistas que non apoiasen as enmendas favorables a España na votación da Eurocámara

 Balseiro lembra que a emenda rexistrada polo Grupo Popular Europeo e defendida pola eurodeputada galega Carmen Fraga non logrou os votos suficientes -pola falta de apoio dos socialistas, incluídos os españois, o bloque nórdico e os Verdes-

 Con todo Balseiro confía en que non tramo final da negociación da reforma da política común pesqueira (PCP) –que debe ser aprobada a través do proceso de codecisión- poida frearse esta pretensión inicia da prohibición inmediata dos descartes e se teñan en conta outros factores como o impacto económico e social que esta decisión pode ter na flota galega.