Agustín Hernandez dará conta deste asunto na sesión Plenaria do Parlamento de Galicia prevista para a semana próxima
BALSEIRO INTERPELARÁ AO CONSELLEIRO DE MEDIO AMBIENTE, TERRITORIO E INFRAESTRUTURAS SOBRE A SITUACIÓN URBANÍSTICA DE BECERREÁ
- Pon de relevo a falta de sensibilidade do alcalde de Becerreá, o socialista Manuel Martínez, quen, a pesar de ser plenamente consciente dos problemas que está a xerar aos seus veciños, leva anos impedindo unha solución
Santiago, 23 de marzo de 2013.- O secretario do Parlamento galego e deputado do Grupo Popular, Jose Manuel Balseiro, interpelará ao conselleiro de Medio Ambiente, Territorio e Infraestruturas, Agustín Hernández, durante a sesión plenaria da Cámara galega da vindeira semana para que explique a situación urbanística do concello lucense de Becerreá, no que a Alcaldía bloquea a aprobación do Plan Xeral de Ordenación Municipal e, deste xeito, impide unha posible solución para legalizar as vivendas que neste momento se atopan fóra da Lei, por carecer da preceptiva licenza.
Balseiro pedirá a Agustín Hernández que explique cales foron os pasos seguidos ata o de agora polo Concello de Becerreá e polos distintos departamentos da Xunta en relación coa tramitación do Plan Xeral e as razóns polas que case oito anos despois de ter iniciado o expediente aínda non hai unha resolución final.
FALTA DE SENSIBILIDADE
O parlamentario popular pon de relevo a falta de sensibilidade do alcalde de Becerreá, o socialista Manuel Martínez, quen a pesar de ser plenamente consciente dos problemas que está a xerar aos seus veciños, leva anos impedindo unha solución.
Balseiro tamén cuestiona ao rexedor socialista lembrando que non tivo reparo en opoñerse ás ordes de derrubo dunha vivenda sancionada por carecer de licenza, pero en cambio foi incapaz durante todo este tempo en impulsar medidas que terían evitado esta sanción.
Entre elas, o parlamentario apunta, como xa se explicou, a tramitación do PXOM e a delimitación do núcleo rural no que se atopa esta e outras vivendas, procedemento que agora parece que si ten previsto facer o concello, logo de que o Grupo Municipal Popular así llo esixira ao alcalde.
