O voceiro do Mar dos populares galegos, Jose Manuel Balseiro, lamenta que PSOE, AGE e BNG, pese a manter unha reunión co sector na que se lles trasladou a importancia deste acordo non votasen favorablemente a esta petición que reclamaban os propios mariñeiros
O PARLAMENTO GALEGO APROBA A INICIATIVA DO GRUPO POPULAR QUE RECLAMA AOS EURODEPUTADOS ESPAÑOIS QUE REXEITEN O ACORDO PESQUEIRO DA UNIÓN EUROPEA CON MAURITANIA
-
Demandan manter un bloqueo namentres non se permita á flota cefalopodeira pescar no caladoiro mauritano
-
Esixen tamén que os gobernos autonómicos de Andalucía e Canarias onde ten porto base gran parte da flota, se invulucren na estratexia de bloqueo do acordo pesqueiro
Santiago, 22 de maio de 2013.- A Comisión de Pesca e Marisqueo do Parlamento de Galicia vén de aprobar unha iniciativa impulsada polo voceiro do Mar dos populares galegos, Jose Manuel Balseiro, pola que se reclama aos eurodeputados españois que voten en contra do acordo pesqueiro entre a Unión Europea e Mauritania, como mínimo, ata que no mesmo non se inclúa a posibilidade de pesca para a flota cefalopodeira.
O acordo parlamentario saíu adiante co apoio do Grupo Popular e parcialmente (no punto primeiro) tamén co voto favorable do BNG. Balseiro lamentou que PSOE, AGE e BNG, pese a manter unha reunión co sector na que se lles trasladou a importancia deste acordo, non foron quen de votar favorablemente a esta petición que reclamaban os propios mariñeiros. Con todo, significou a importancia da iniciativa aprobada e de que sexa o Parlamento galego o que pida aos nosos representantes europeos unha toma de posición firme en defensa dos intereses dos mariñeiros galegos que, ata o de agora, viñan traballando no caladoiro mauritano.
O texto final tamén mantén a petición formulada polo Grupo Popular para que os gobernos autonómicos andaluz e canario se invulucren na estratexia de bloqueo do acordo pesqueiro, que para entrar en vigor de xeito definitivo precisa ser ratificado polas institucións comunitarias. Balseiro lembrou, neste senso, que son estas dúas comunidades onde teñen base maioritariamente os barcos cefalopodeiros, aínda que gran parte da tripulación é galega.
A XUNTA ACTÚA DESDE O PRIMER MOMENTO
Balseiro defendeu as xestións levadas a cabo tanto pola Xunta como desde o Ministerio e lembrou que veñen traballando activamente para corrixir a “desastrosa negociación” do anterior Goberno socialista que, “incomprensiblemente aceptou os termos máis férreos e duros deste acordo pesqueiro co país africano”.
Agora os populares teñen postas as súas esperanzas nas dúas vías de traballo abertas por Xunta e Goberno central, tanto na Eurocámara como na negociación directa coa propia Comisión Europea. Iso si, Balseiro lamentou o erro estratéxico do PSOE, que primeiro deu pé a unha mala negociación e agora pide que se negocie bilateralmente con Mauritania un acordo que é multilateral e que se decide en Bruxelas.
O deputado popular quixo manter unha postura optimista cara o futuro respecto da reconsideración dos termos máis negativos do acordo e lembrou que a presión da Xunta e do Goberno central xa ten acadado algúns avances. Así, por exemplo, Balseiro explicou que foi a petición do Goberno galego polo que se incluíu á flota cefalopodeira no anexo do propio acordo pesqueiro –aínda que con cota cero- o que permitiría outorgarlle posibilidades de pesca no futuro. E tamén, Xunta e Ministerio forzaron a reunión do Comité Científico previsto no propio acordo, ao obxecto de acreditar o bo estado do recurso do polbo no caladoiro mauritano.
