Jose Manuel Balseiro lamenta que a oposición non dea resposta ao ofrecemento da conselleira do Medio Rural e do Mar que instaba a “loitar, todos xuntos, contra o que debera ser o noso verdadeiro inimigo común: aquel que provoca incendios nos nosos montes”
OS SOCIALISTAS BLOQUEAN NO PARLAMENTO UN ACORDO CON PROPOSTAS PARA MELLORAR O SISTEMA DE PREVENCIÓN E EXTINCIÓN DE INCENDIOS
- Os populares estaban dispostas a apoiar 4 dos 7 puntos incluídos na iniciativa do Grupo Socialista pero o PSOE rexeitou esta posibilidade.
- Desde o PP defenden as novas brigadas municipais porque os concellos son os que mellor coñecen o seu territorio e, polo tanto, colaboran con eficacia na planificación da estratexia contra os lumes forestais, un modelo que os alcaldes tamén apoian.
Santiago, 28 de maio de 2013.- Os socialistas bloquearon esta tarde no Parlamento un acordo que puido ser aprobado co voto favorable de todos os partidos políticos e no que se incluían unha serie de actuacións para levar a cabo polo Goberno galego en materia de mellora do sistema de prevención e extinción de incendios forestais.
Os populares, solicitaron a votación por puntos, extremo que o PSOE non aceptou, e que puidera ter permitido aprobar 4 das 7 propostas incluídas na moción plenaria do Grupo Socialista. Finalmente como a votación efectuouse dos 7 puntos no seu conxunto, o acordo no foi posible e o Grupo Popular votou en contra do contido da iniciativa.
O deputado popular, Jose Manuel Balseiro, aproveitou a súa intervención para lamentar a actitude da oposición e dar testemuña do ofrecemento feito pola conselleira do Medio Rural e do Mar, Rosa Quintana, quen no pasado pleno, chamou a “loitar, todos os grupos políticos xuntos, contra o que debera ser o noso verdadeiro inimigo común: aquel que provoca incendios nos nosos montes”
BRIGADAS MUNICIPAIS
Por outra banda, fronte as críticas da oposición Jose Manuel Balseiro defendeu o novo modelo de brigadas municipais que “complementan e ofrecen unha resposta inmediata nas tarefas de prevención e extinción de incendios”. Dixo tamén que xa se están a asinar os convenios de colaboración en todos os distritos forestais, coa boa acollida dos alcaldes, e que estes acordos contan co visto e prace da FEGAMP.
Balseiro quixo poñer en valor a importancia da colaboración entre a Xunta e os concellos xa que ninguén coñece mellor o seu territorio como as administración locais e, polo tanto, ninguén mellor que eles poden planificar dun xeito acertado e coordinado coa Xunta a estratexia a desenvolver contra as situacións de lume forestal.
PLADIGA
Os populares tamén rexeitaron a proposta do PSOE de presentar xa en xaneiro o PLADIGA (plan de defensa contra os incendios forestais) xa que anticipalo suporía recortar a súa efectividade, pois este documento se encarga de planificar a temporada de alto risco –a tempada estival-. A súa elaboración te lugar logo de coñecerse o orzamento dispoñible, a situación climatolóxica invernal e primaveral, e facer as consultas pertinentes cos distintos distritos forestais. Lembrou neste senso que o propio PSOE sabe que este é procedemento correcto, e por iso no mandato do bipartito, aprobaron o PLADIGA tamén sempre a mediados ou a finais do mes de maio.
PERSOAL
Finalmente Balseiro volveu a defender a necesaria colaboración entre as administración e empresas concesionadas que permiten, entre outros dispoñer de medios moi especializados na súa tecnoloxía como os avións de carga en terra e dixo que desde a Xunta se defende unha profesionalización progresiva do dispositivo contra os incendios.
Asegurou que o 94% das brigadas permanentes teñen os seus postos cubertos, con case 2.000 profesionais e que as vacantes serán cubertas a través do procedemento habitual, valorando experiencia e aplicando criterios públicos como a publicidade, mérito e capacidade.
