O Valadouro

Os populares presentaron un recurso contra o pacto económico que condiciona a gobernabilidade deste concello lucense e fixérono nun exercido de responsabilidade cos veciños e para que non se vira prexudicada a saúde democrática

A Xustiza admite a trámite o recurso do Partido Popular que pode dar lugar á impugnación xudicial da moción de censura do Valadouro

240000_10200226221155024_1725483618_o

  • O Xulgado nº2 do Contencioso-Administrativo de Lugo acorda continuar o procedemento xudicial e da un prazo de 8 días para que se presente a demanda
  • Aclaran que o Xulgado puido ter decidido non continuar o procedemento polo que o tribunal decantouse a favor da petición do PP
  • Sexa cal sexa o pronunciamento xudicial final este sentará precedente polo inédito do pacto que pon prezo a alcaldía dun concello

O Valadouro, 12 de xullo de 2013.- O Xulgado nº2 do Contencioso-Administrativo de Lugo acordou admitir a trámite o recurso do Partido Popular que pode dar lugar á impugnación do acordo adoptado na moción de censura do Valadouro.

Este tribunal lucense resolve continuar o procedemento xudicial e as actuacións procesuais oportunas e establece un prazo de 8 días (a contar desde o pasado martes) para que o Partido Popular presente a súa demanda.

Este é o primeiro pronunciamento xudicial que coñecemos e nel tamén o Xulgado decide tramitar este asunto a través do procedemento especial que a lei contempla para a protección dos dereitos fundamentais da persoa. Os populares alegaron que o voto emitido polos concelleiros do PSOE, Udival e BNG está condicionado polo pacto asinado ante notario e moi en concreto, no caso do actual bipartito, pola cláusula que obriga a pagar 100.000 euros en caso de ruptura do goberno.
Da decisión do Xulgado lucense deron conta hoxe os populares nunha rolda de prensa na que, o exalcalde e actual portavoz popular, Jose Manuel Lamela, e os concelleiros do Grupo Municipal Popular, estiveron arroupados por Jose Manuel Balseiro, secretario provincial, María Elena Candia, vicesecretaria e polo coordinador da Mariña lucense, Jose María González Barcia.

A FAVOR DA PETICIÓN DO PP

O PP quixo poñer en valor a decisión do Xulgado xa que, segundo salientaron, “podería ter acordado non continuar co procedemento, pero decidiu todo o contrario, que si tiña sentido continuar analizando a súa posible impugnación, decantándose a favor da petición do PP”. Agora será a Xustiza –nun proceso Contencioso-Administrativo- quen terá que determinar a legalidade dos feitos acontecidos neste concello.

SAÚDE DEMOCRÁTICA

Os populares tamén explicaron que con independencia de si o pacto e posterior acordo que levou ao bipartito ao goberno local se axusta ou non a dereito, é indiscutible que prexudica á saúde democrática e ao municipalismo no seu conxunto, xa que limita a liberdade de acción e o comportamento dos concelleiros.

RESPONSABILIDADE

Din tamén que sexa cal sexa a decisión final do tribunal sentará precedente “xa que se trata dun feito inédito en democracia e nunca antes avaliado pola xustiza” e adiantan que, como a impugnación pasa a unha fase xudicial “non queren facer xuízos paralelos pero si insistir en que o recurso presentouse por responsabilidade cos veciños do Valadouro e por respecto aos principios máis básicos do noso sistema democrático”

No Partido Popular non ocultan a súa satisfacción ante a resolución adoptada polo Xulgado no convencemento de que, tendo en conta a gravidade e transcendencia públicas dos feitos, será moi positivo que os avalíe a Xustiza. Insisten tamén en que se acumulan as razóns para que o bipartito no goberno local, ou o BNG, fagan público o documento notarial do pacto que aínda ocultan á opinión pública.