O voceiro do Mar do Grupo Popular, Jose Manuel Balseiro, alerta que a sobreexplotación do caladoiro Atlántico Nordeste prexudica á flota pesqueira comunitaria, entre elas, a galega

O PARLAMENTO GALEGO APROBA A INICIATIVA DO GRUPO POPULAR QUE RECLAMA A IMPOSICIÓN DE SANCIÓNS A ISLANDIA E ÁS ILLAS FEROE POLA SOBREPESCA DE XARDA

• Os populares salientan que a Xunta de Galicia, o Goberno de España e os Executivos de Francia, Reino Unido e Irlanda, apoian tamén esta petición reforzada polo acordo parlamentario
• Balseiro foi moi crítico cos partidos da oposición que non quixeron sumarse a esta petición que defenden os propios profesionais do sector e sinalou que o Partido Popular estará sempre ao carón dos intereses de Galicia

Santiago, 2 de outubro de 2013.- O Parlamento de Galicia aprobou hoxe a iniciativa do Grupo Popular na que se reclama a imposición de sancións a Islandia e ás Illas Feroe pola sobrepesca de xarda. As flotas destes dous países comparten coa flota europea as augas dos caladoiros do atlántico Nordeste e, polo tanto, faenan sobre os mesmos recursos pesqueiros que pode verse afectado por esta situación de pesca incontrolada.

O acordo, máis en concreto, insta ao Goberno galego a dirixirse á Comisión Europea, aos deputados das forzas parlamentarias galegas con representación na Eurocámara e ao Ministerio de Agricultura, Alimentación e Medio Ambiente para demandarlles a continuidade no apoio para a posta en marcha de medidas sancionadoras comerciais contra Islandia e as Illas Feroe mentres persistan en sobreexplotar os stocks comunitarios de xarda.

Balseiro foi moi crítico cos partidos da oposición –PSOE, BNG e AGE- que non quixeron sumarse a esta petición a pesar de que esta a ser defendida polos propios profesionais do sector e sinalou que o Partido Popular estará sempre ao carón dos intereses de Galicia e propoñendo iniciativas no Parlamento galego que responda a estes obxectivos.

AUMENTO UNILATERAL DE CAPTURAS

O portavoz do Mar dos populares galegos explicou que ambas flotas decidiron unilateralmente o aumento das capturas moi por riba dos seus dereitos históricos e sen ningún respecto polos informes científicos. Así Islandia incrementou as súas capturas de 2.000 hasta 130.000 toneladas e, no caso das Illas Feroe fixo o propio incrementando de 25.000 a 85.000 toneladas. Os populares temen que estas decisións rematen por compromenter a situación biolóxica desta especie e, en consecuencia, prexudique ao conxunto das flotas.

AVAL NA NORMATIVA COMUNITARIA

Balseiro lembrou, durante a súa internvención que UE dotouse en setembro de 2012 dun instrumento legal que permite impoñer sancións no caso de que xurdan este tipo de problemas e fallen as negociacións con eses países.

As posibles medidas comerciais que formarían parte das sancións van desde prohibicións á importación ata o bloqueo dos portos da UE para os buques pesqueiros dos países incumpridores.

Balseiro aclarou que a Unión Europea xa iniciou un proceso sancionador contra as Illas Feroe, que aplauden os populares galegos e insiste na importancia de ampliar estas sancións para que tamén inclúan á flota islandesa.

APOIO DA XUNTA E DO ESTADO

Balseiro tamén dixo que esta petición –que aparece reforzada con este acordo unánime do Parlamento- tamén conta co apoio da Xunta de Galicia, do Goberno de España, e dos Executivos de Francia, Reino Unido e Irlanda, que veñen de insistir á Unión Europea para que poña en marcha estas sancións.

Non parece moi lóxico –conclúe o deputado popular- que, mentres as flotas comunitarias están apostando pola sostibilidade pesqueira, de tal xeito que adaptamos as nosas posibilidades de pesca de conformidade cos ditames científicos, existan países que unilateralmente renuncien a todo esforzo de conservación e fixen as súas cotas individualmente sen ningunha restrición