Jose Manuel Balseiro, autor da iniciativa, salienta a importancia social, laboral e cultural desta empresa para Galicia e para os concellos e comarcas nas que se radica
O PARLAMENTO GALEGO APROBA POR UNANIMIDADE A INICIATIVA DO GRUPO POPULAR EN APOIO DE SARGADELOS
- O texto definitivo, acordado co representante dos traballadores, insta á Xunta a impulsar as iniciativas e ferramentas ao seu alcance para, en colaboración coa empresa e os traballadores, procurar a viabilidade da Cerámica de Sargadelos (Cervo) e da Cerámica de O Castro (Sada)
Santiago, 11 de decembro de 2013.- O Parlamento de Galicia aprobou hoxe, por unanimidade, unha iniciativa do Grupo Popular en apoio de Sargadelos e ante a situación de dificultade pola que pasa esta emblemática compañía que vén de anunciar a posta en marcha dun ERE –expediente de regulación de emprego- que completa o despedimento de 68 traballadores do seu cadro de persoal.
Segundo explicou o autor da iniciativa, o deputado popular Jose Manuel Balseiro, o acordo parlamentario insta á Xunta de Galicia, a impulsar as iniciativas e ferramentas ao seu alcance para, en colaboración coa empresa e os traballadores, procurar a viabilidade da Cerámica de Sargadelos (Cervo) e da Cerámica de O Castro (Sada), os dous centros produtivos que este grupo empresarial ten na nosa comunidade.
PROSPERA O TEXTO PACTADO COS TRABALLADORES
A iniciativa foi aprobada cos votos a favor do Grupo Popular e co apoio das forzas da oposición, que renunciaron a incorporar as emendas formuladas, para acoller a literalidade do texto pactado polo propio Jose Manuel Balseiro cos representantes do traballadores, e que está centrado en acadar os apoios necesarios para conseguir un proxecto que dea viabilidade ás fábricas e o respaldo das institucións.
SUMAR O APOIO DE DISTINTAS ADMINISTRACIÓNS
Neste sentido Balseiro lembrou que, ata o momento, a única administración que ten apoiado economicamente á empresa foi a Xunta de Galicia que, no ano 2010, outorgou diversas axudas e, aproveito a súa intervención, para facer un chamamento instando a que outras administracións poidan implicarse tamén en apoio da continuidade dunha cerámica que chegou a converterse por méritos propios en símbolo de identidade de Galicia.
