O voceiro de Montes, Jose Manuel Balseiro, sinala que en 2013 estes emprazamentos tiveron a consideración de bases alternativas, empregadas en función das necesidades de extinción, para operacións de mantemento e repostaxe pero non estiveron pechadas
O GRUPO POPULAR LEMBRA QUE AS BASES DOS HELICÓPTEROS CONTRA INCENDIOS DO BARCO E PORTOMARÍN MANTIVÉRONSE OPERATIVAS PARA ATENDER LABORES DE EXTINCIÓN NO ENTORNO
-
Os populares aclaran que para o presente ano non está pechada a distribución dos medios aéreos que responderá a criterios exclusivamente técnicos e non políticos
-
O Grupo Popular rexeitou unha iniciativa de AGE con propostas contraincendios “de marcado carácter político” e sinalou a importancia de abrir un debate “amplo e apartidista”
Santiago, 28 de marzo de 2014.- O voceiro de Montes e Prevención de Incendios do Grupo Parlamentario Popular, Jose Manuel Balseiro, lembrou hoxe que as bases dos helicópteros contra incendios do Barco de Valdeorras (Ourense) e Portomarín (Lugo) mantivéronse operativas para atender as labores de extinción que puideron ter lugar no seu contorno.
Balseiro aclara que en 2013 estes emprazamentos tiveron a consideración de “bases alternativas”, empregadas –como xa se explicou- “en función das necesidades de extinción” polo que non pode afirmarse “que estiveran pechadas”, ademais nelas tamén se desenvolveron “tarefas de repostaxe e mantemento das aeronaves” que fixeron uso das mesmas
CRITERIOS TÉCNICOS NON POLÍTICOS
Estas declaracións tiveron lugar no transcurso da Comisión 7ª de Agricultura e Montes do Parlamento de Galicia onde os deputados do Grupo Popular rexeitaron a iniciativa do BNG destinada a recuperar como bases permanentes estes emprazamentos. Os populares entenderon que esta petición non era procedente xa que para o presente ano non está pechada a distribución dos medios aéreos que se determinará no PLADIGA “en base a criterios exclusivamente técnicos e non políticos”
COBERTURA INMEDIATA E AÉREA EN 20 MINUTOS
O portavoz popular tamén quixo salientar que a cobertura dun hipotético incendio queda totalmente garantida nas comarcas onde se sitúan estas bases, primeiramente cos medios terrestres da Xunta e do Ministerio e despois cos aéreos que temos próximos.
Aclarou que a área de Valdeorras e a de Portomarín pódese cubrir en arredor de 20 minutos desde varias bases contiguas: as de Becerreá, Laza, Vilamaior-Verín, Doade-Sober, Antela-Xinzo De Limia, San Xoán De Rio, Lavacolla (Hidroavións), Rozas- Lugo e Marroxo-Sober.
UN DEBATE APOLÍTICO
Os votos do Grupo Popular tamén rexeitaron unha iniciativa que sorprendentemente Alternativa Galega de Esquerdas volveu a traer á Comisión de Montes logo de ser rexeitada o ano pasado e na que realizaban unha serie de propostas “con marcado carácter partidista” para incorporar á política de extinción e prevención de incendios.
Balseiro sostivo que os lumes forestais son un problema de país, que en Galicia adquire unha relevancia especial, “tanto pola intensidade, como pola acción dos incendiarios” e sinalou que, aínda que son receptivos a calquera proposta sobre novas estratexias de combate desta lacra, este debate “debería propoñerse en sentido amplo, superando as diferenzas partidistas”. O deputado aclarou que aprobar as peticións de AGE “sería facer que só opine a Asemblea Galega Contra o Lume, e iso non sería xusto, nin completo”
