Brigadas contraincendios

O voceiro de Montes do Grupo Popular di que Suárez Barcia e Edmundo Maseda deberían tomar exemplo doutros alcaldes da provincia e da comarca, de todas as cores políticas que, nun acto de responsabilidade e defensa dos intereses dos seus veciños, decidiron solicitar brigadas forestais

BALSEIRO ACUSA AOS ALCALDES DE RIBADEO E O VALADOURO DE “IMPRUDENCIA TEMERARIA” POR NON SOLICITAR AS BRIGADAS CONTRA INCENDIOS

 Balseiro en Rolda de prensa

  • Dáse a circunstancia que estes dous concellos sufriron, nas últimas datas, os lumes máis virulentos de toda a comarca
  • Pérdese ademais a oportunidade de xerar novos postos de traballo para os brigadistas, financiados nun 75% pola Xunta
  • Lembra que lexislación vixente obriga aos concellos a colaborar coa administración autonómica na loita contra esta lacra

Santiago, 30 de xuño de 2014.- O voceiro de Montes do Grupo Parlamentario Popular, Jose Manuel Balseiro, acusou esta mañá de imprudencia temeraria aos rexedores de Ribadeo e O Valadouro por non solicitar as brigadas contra incendios.

 José Manuel Balseiro manifestou que, tanto Fernando Suárez coma Edmundo Maseda, deberían tomar exemplo doutros rexedores da provincia de Lugo que, con moi distintas cores políticas, si decidiron conveniar coa Xunta as brigadas municipais nun acto de responsabilidade cos intereses dos seus veciños.

De feito, na comarca da Mariña só os concellos de Ribadeo e O Valadouro non disporán deste servizo. No caso deste último municipio é ademais a primeira ocasión na que non se disporá de brigada contraincendios durante o verán xa que, cando no Valadouro gobernaba o Partido Popular, sempre se solicitou e contou con ela.

DOUS CONCELLOS CON ALTA INCIDENCIA INCENDIARIA

Para o voceiro de Montes do Grupo Popular os alcaldes de Ribadeo o do Valadouro non poden ser alleos a un dato que dá mostra da importancia de dispoñer das brigadas forestais, como é o feito de que, precisamente estes dous concellos de A Mariña, foron os que sufriron os lumes máis virulentos nestas últimas datas.

Neste senso o deputado popular cualificou de moi lamentable que Fernando Suárez e Edmundo Maseda non dean a importancia que teñen as brigadas, chamadas a ofrecer unha primeira intervención en caso de incendio, pero tamén a executar labores de prevención, limpeza e desbroces, moi necesarias no verán, época de alto risco.

Ambos mandatarios locais esquecen tamén que os incendios forestais son unha ameaza non só ao patrimonio forestal público e privado (tanto montes de particulares, montes veciñais en man común), senón aos recursos naturais e ao mantemento e desenvolvemento da actividade persoal e profesional no medio rural.

COLABORACIÓN OBRIGADA POR LEI E PERDA DE EMPREGOS

Jose Manuel Balseiro aclarou que a lexislación vixente establece a obrigatoriedade dos concellos de colaborar coa Xunta de Galicia na loita contra esta lacra. En concreto, os concellos teñen atribuídas, a teor dos artigos 80 da Lei 5/1997, de 22 de xullo, de administración local de Galicia e 25 da Lei 7/85, do 2 de abril, reguladora das bases de réxime local, competencias en materia de protección do medio ambiente, protección civil e a prevención e extinción de incendios.

Por este motivo o Goberno galego puxo en marcha os convenios para a constitución das brigadas e polos que a Xunta financia ata o 75% do total dos custes salariais das persoas contratadas. Balseiro sinala finalmente que non só se está renunciando a esta axuda senón tamén á creación de novos empregos, aos das persoas que se contratarían para cubrir este servizo durante tres meses nos respectivos concellos.