Así o asegurou o secretario xeral de Medio Rural e Montes, a preguntas do deputado Jose Manuel Balseiro

A Xunta destinou máis de 3,3 millóns de euros en axudas para a prevención e defensa contra os incendios forestais en montes veciñais de man común

• O secretario xeral de Medio Rural e Montes,Tomás Fernández-Couto, sinalou que foron atendidas máis do 75% das solicitudes presentadas polos titulares de montes veciñais en man común

Santiago, 13 de novembro de 2014.- A Xunta destinou máis de 3,3 millóns de euros en materia de axudas para a prevención e defensa contra os incendios forestais en montes veciñais de man común. Así o sinalou esta mañá o secretario xeral do Medio Rural e Montes, Tomás Fernández-Couto, en resposta a unha pregunta na Comisión 7ª do Parlamento.

Ademais, tal e como engadiu o responsable de Medio Rural e Montes, esa cantidade permitiu que máis do 75% das solicitudes presentadas polos titulares destes montes puidesen ser atendidas. Fernández-Couto explicou que a orde que regulaba a concesión destas subvencións cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2007-2013 foi publicada a comezos deste ano e establecía unha contía de 3.000.000 euros. Unha achega que coa publicación en xullo dunha Orde de ampliación orzamentaria ascendeu ata os 3.350.000 euros, sinalou.

Nese sentido o secretario xeral indicou que a orde establecía dúas grandes liñas de subvención. Por un lado, unha primeira liña de axuda, destinada ao control selectivo de combustible; por outro, a segunda partida orzamentaria, dirixida á construción de puntos de auga.

Nota completa: Xunta.es

Como complemento indicar que, na quenda de réplica, Jose Manuel Balseiro salientou o feito –confirmado polo secretario xeral de Montes- de que o ano próximo, 2015, o orzamento dispoñible para esta ñia de axudas será aínda maior, ata chegar aos 8 millóns de euros, o que reforza a aposta da Xunta pola cooperación coas comunidades de montes nas tarefas de prevención e extinción de incendios.