Pleno do Parlamento 03 /12

O voceiro do Mar do Grupo Popular, Jose Manuel Balseiro, explica que servirá como documento de referencia nas negociacións que se abren co resto das comunidades autónomas, o Ministerio, Portugal e a Unión Europea

O PARLAMENTO APROBA A INICIATIVA DO GRUPO POPULAR E RESPALDA O PLAN DE XESTIÓN DA SARDIÑA PROPOSTO POLO CONSELLO GALEGO DE PESCA

 parlamento

  • Os populares son moi críticos cos partidos da oposición tras votar en contra PSOE, BNG e AGE do modelo de xestión que, segundo lembraron desde o PP, elaboraron os propios profesionais da flota galega do cerco

Santiago, 3 de decembro de 2014.- O Parlamento de Galicia aprobou a iniciativa do Grupo Popular pola que se respalda o plan de xestión da sardiña proposto pola Comisión Sectorial do Cerco do Consello Galego de Pesca.

O voceiro do Mar do Grupo Popular, Jose Manuel Balseiro, explicou que o acordo insta á Xunta a asumir como propio esta proposta do sector e convertela no documento de referencia nas negociacións que se desenvolverán nas vindeiras semanas co resto das comunidades autónomas, o Ministerio, Portugal e a Unión Europea.

Os populares foron moi críticos coa postura mantida polas forzas políticas da oposición, tras votar en contra desta iniciativa PSOE, BNG e AGE, pese a que tiña por único obxecto outorgar un aval político e sumar forzas á hora de defender o modelo de xestión que elaboraron os propios profesionais da flota galega do cerco.

Balseiro indicou que apoiando esta iniciativa se podía demostrar se estaban a favor do sector ou na súa contra e, neste caso, a oposición decidiu desprezar as demandas do cerco e darlles as costas, unha actividade que reprochou especialmente aos socialistas que sen rumbo, teñen decidido facer seguidismo do BNG e AGE.

MEDIDAS DE XESTIÓN IMPRESCINDIBLES

O voceiro do Mar lembrou que a mala situación biolóxica na que se atopa o stock da sardiña ibérica obriga a tomar medidas que contribúan á recuperación desta especie, que se pesca en augas españolas e portugueses pola flota de ambos países.

Balseiro lembra que de non chegarse a un acordo bilateral entre España e Portugal sobre o plan de xestión, existía unha advertencia seria da Comisión Europea de establecer un Total Admisible de Capturas (TAC) comunitario para sardiña, que sería moito máis restritivo e especialmente prexudicial para a flota do cerco galega.

 

Os populares insisten en mudar a norma vixente e defender que o novo modelo de plan de xestión proposto polos profesionais do cerco para 2015 permitirá unha mellor defensa dos intereses da flota galega de cerco e por iso non comprenden como a oposición pode negarse a outorgar o seu apoio á que non deixa de ser a posición dos profesionais galegos neste debate.

 

SAÚDOS, GABINETE DE COMUNICACIÓN DO

GRUPO PARLAMENTARIO POPULAR DE GALICIA.

Telfs.: 981 55 15 19 / 20