Celeiro

O presidente de Portos de Galicia, José Juan Durán, visitou esta mañá o porto de Celeiro, en Viveiro

 PORTOS DE GALICIA DESTINA MÁIS DE 241.000 EUROS Á MELLORA DOS MEDIOS DE AMARRE E DEFENSAS DO PEIRAO DE CELEIRO

 Xunta.es /Conchi Paz

  • Con esta actuación aumentarase a seguridade e operatividade grazas á colocación de novos elementos de protección e seguridade en varias zonas de atraque do peirao

 

Santiago, 10 de xuño de 2015.- Portos de Galicia destina máis de 241.000 euros á mellora dos medios de amarre e defensas do peirao de Celeiro, en Viveiro. O presidente do Ente público, José Juan Durán, presentou esta mañá o proxecto durante a visita ao porto mariñán.

Esta instalación portuaria verá mellorada a súa seguridade e operatividade grazas á colocación de novos medios de amarre e defensas en varias zonas de atraque de embarcacións. Así, colocaranse morróns e defensas verticais de caucho e rosario atendendo ás recomendacións para as obras marítimas (ROM).

No marco destas actuacións está prevista a colocación de 12 defensas tipo vertical de caucho, que substituirán ás antigas no peirao comercial, así como 5 novos morróns de 75 Tn de carga en aceiro para atraques que faciliten a carga de minerais. Finalmente no peirao pesqueiro colocaranse outros 6 morróns de 50 Tn de carga, 13 defensas verticais e outras 6 de rosario.

Ademais, tamén se realizarán outras obras complementarias como é o repintado da cantoneira do peirao comercial e do pesqueiro, nun tramo de 535 metros lineais de peirao. Esta actuación reafirma o compromiso da Consellería do Medio Rural e do Mar, a través de Portos de Galicia, cun porto puxante e competitivo.