O portavoz do Medio Rural, Jose Manuel Balseiro, mandou unha mensaxe de agradecemento e apoio aos membros do dispositivo contra incendios e aos veciños da zona que se mobilizaron ante o incendio acontecido neste espazo natural

O GRUPO POPULAR LEMBRA QUE ESTÁ EN ELABORACIÓN UN NOVO PLAN DE EMERXENCIAS QUE OUTORGARÁ UN “PLUS DE PROTECCIÓN” Á ILLA DE CORTEGADA

• Aclara tamén que anualmente desenvólvense unha serie de estudos ambientais nesta illa e, en función dos resultados, se planifican as limpezas e tarefas de xestión relacionadas directamente coa prevención de incendios forestais

Santiago, 11 de setembro de 2015.- O Grupo Parlamentario Popular lembrou hoxe que está en elaboración un novo plan de emerxencias do parque natural das Illas Atlánticas que outorgará un “plus de protección” á Illa de Cortegada, tamén no ámbito da prevención de lumes.

O voceiro da área forestal, Jose Manuel Balseiro, aclarou que, aínda que na actualidade xa existe un protocolo de detección e primeira mobilización ante unha alarma de incendio, este debe ser mellorado e actualizado, cousa que se fará co novo documento en redacción.

IMPORTANCIA E VALOR MEDIOAMBIENTAL

Balseiro defendeu a importancia e o valor ambiental, paisaxístico e natural da illa de Cortegada e, por iso, non puido deixar de lamentar que teña acontecido un incendio. “Todo apunta a que foi intencionado ou froito dunha neglixencia e, de feito, nesa liña parece que se desenvolve a investigación aberta”, sinalou.

“Sufrimos unha triste realidade: a inmensa maioría dos lumes forestais que sufre Galicia son resultado da acción humana, de alguén que prende o lume ou de alguén que, pola súa neglixencia, fai que isto aconteza. Si a algo debe esixir esta circunstancia é obrigarnos a extremar as precaucións”, indicou.

PLANIFICACIÓN ANUAL DAS LIMPEZAS

No tocante ás labores de prevención, Balseiro clarexou que anualmente desenvólvense unha serie de estudos avalados por técnicos expertos e de recoñecido prestixio na materia, entre os que están, o seguimento dos hábitats costeiros e terrestres, inventario de flora, estudo dos liques, seguimento de pragas e análises fitosanitarias e datos meteorolóxicos. Precisamente coa información obtida nestes seguimentos “planifícanse as limpezas e tarefas de xestión relacionadas directamente coa prevención de incendios forestais nesta illa”.

Para rematar Balseiro tamén quixo mandar unha mensaxe de agradecemento e apoio aos membros do dispositivo de loita contra os incendios, “tanto aos traballadores que participaron na illa de Cortegada como aos que o fan noutros incendios en Galicia”. Agradecemento que fixo extensible aos veciños da zona que, nunha mobilización sen precedentes, colaboraron coa extinción deste lume nun espazo tan sensible.