Comisión de Pesca 22/09b

Aseguran que tanto Rosa Quintana como todo o equipo directivo da Consellería do Mar son “plenos interlocutores válidos” do sector marisqueiro desta zona, tal e como demostran os múltiples encontros que mantiveron nas pasadas datas, o último, o xoves

O GRUPO POPULAR REAFIRMA O COMPROMISO DA XUNTA COA RECUPERACIÓN PRODUTIVA DA RÍA DE AROUSA

1

  • Balseiro: “Ninguén estivo de brazos cruzados na ría de Arousa e seguirase traballando, en colaboración coas confrarías, para solucionar os problemas detectados”


Santiago, 22 de setembro de 2015.- O voceiro do Mar do Grupo Popular, Jose Manuel Balseiro, reafirmou o compromiso da Xunta de Galicia coa recuperación produtiva da ría de Arousa e, en particular, coa mellora da situación marisqueira dos lombos do Ulla, Cabío e Bohído.

Balseiro reafirmou que tanto a conselleira do Medio Rural e do Mar, Rosa Quintana, como todo o equipo directivo deste departamento autonómico “son plenos interlocutores válidos do sector marisqueiro da ría de Arousa”, tal e como demostran os múltiples encontros que mantiveron, -e que repasou o deputado- o último, o pasado xoves, na xuntanza mantida entre a propia titular e os patróns maiores da zona.

O voceiro popular acusou ao BNG de “confundir desexos con realidade ao negar esta interlocución” e lamentou que os nacionalistas non tiveran retirado a iniciativa que presentaron na Comisión de Pesca do Parlamento de Galicia por entendela “obsoleta e carente de sentido” pois nela demandaban precisamente que a conselleira recibise aos patróns maiores, algo que xa estaba previsto e xa se produciu.

INICIATIVAS ACORDADAS COAS CONFRARÍAS

Balseiro insistiu en que “ninguén estivo de brazos cruzados” na ría de Arousa e dixo que “se seguirá traballando, en colaboración coas confrarías, para solucionar os problemas detectados e, moi en particular nas áreas de libre marisqueo”

Así por exemplo lembrou os cambios na explotación do banco dos Lombos de Ulla acordados nas pasadas datas, limitando a zona de extracción da ameixa babosa e deu conta tamén do estudo levado a cabo dende a Consellería para facer fronte á escaseza de berberecho.

Balseiro explicou que se realizaron outras tarefas como á remoción do sedimento nunha parte do Bohído que actualmente non é produtiva, fíxose a limpeza de restos de algas nos fondos dunha parte de Cabío e levouse a cabo un control de depredadores, coa retirada de máis de 3 toneladas de cornechos na enseada do Grove durante o pasado mes de xullo.

Finalmente o pasado 18 de setembro concretáronse cos patróns maiores da zona as medidas de rexeneración do reló nos bancos do Bohído e Cabío que consistirá no traslado dos exemplares de reló de talla superior a 35 mm por fóra dos bordes dos bancos marisqueiros nos que abunda.