Pleno 29/09

Balseiro defende o traballo conxunto do Goberno galego con esta flota no impulso de medidas que melloren a comercialización e dean máis valor e prezo á súa actividade

O GRUPO POPULAR LEMBRA QUE AS COTAS DAS PRINCIPAIS ESPECIES OBXECTIVO DA FLOTA DO CERCO SUBIRON UN 52% DESDE O ANO 2009

Flota

  •  Se hoxe as posibilidades de pesca son insuficientes, que cualificativo merecerían cando co PSOE e o BNG no goberno eran notablemente inferiores
  •  Os populares defenderán o cumprimento do compromiso do Goberno central para dispor de posibilidades de pesca adicionais cando a anchoa estea presente en augas galegas

 

Santiago, 29 de setembro de 2015.- O voceiro do Mar do Grupo Popular, Jose Manuel Balseiro, lembrou esta tarde que as cotas de pesca das principais especies obxectivo do cerco (xarda, xurelo e anchoa) aumentaron nun 52% desde o 2009 e incluso, soben tamén comparándoas co ano pasado, neste caso, nun 4,4%.

“Sempre poderán ser maiores, e os populares seguiremos defendendo novas subas. Pero se hoxe as posibilidades de pesca son insuficientes, que cualificativo merecerían cando con PSOE e BNG no goberno eran notablemente inferiores”-preguntouse Balseiro tras lembrar que “as forzas da actual oposición daquela estaban conformes e permanecían caladas ante a mala situación do sector”

En contraste, Balseiro relatou e puxo en valor as distintas medidas impulsadas pola Consellería do Medio Rural a favor deste sector, entre elas, defendeu o traballo conxunto do Goberno galego coa flota do cerco no impulso de iniciativas de autoregulación e mellora da comercialización, dirixidas a procurar maior valor engadido para a súa actividade e a conseguir unha maior rendibilidade e mellor prezo nas capturas.

REPARTO PREXUDICIAL

Os populares empregaron os devanditos argumentos no transcurso do debate dunha moción do PSOE que, no Pleno do Parlamento de Galicia, reclamaba un reparto para esta flota en base a criterios socioeconómicos, isto é, en función do número de tripulantes.

Balseiro dixo que aprobar a petición socialista “sería prexudicial para os intereses da flota do cerco” e retoulles a estudar caso por caso, e especie por especie, para comprobar que un reparto por tripulante sería moito máis negativo que o criterio que se emprega na actualidade e que inclúe en distinta ponderación capturas históricas e con outros criterios socioeconómicos.

O voceiro popular destacou na súa intervención o bo reparto do xurelo (especialmente en augas ao sur de Fisterra, nas que a nosa flota dispón do 98% da cota total) e o non tan bo reparto na xarda, “pois as posibilidades reais de pesca víronse reducidas como consecuencia do pago dunha multa pola sobrepesca desta especie cometida en 2009 e 2010, isto é, con PSOE e BNG no goberno”.

MÁIS COTA DE ANCHOA

O voceiro Mar do Grupo Popular dixo que unha petición na que todas as forzas políticas galegas parecen coincidir é en reclamar o cumprimento do compromiso do Goberno central para dispor de posibilidades de pesca adicionais de anchoa cando esta especie pesqueira migratoria estea presente en augas galegas. E, nese senso convidou á oposición a votar favorablemente a unha iniciativa que os populares galegos defenderán con este obxectivo no pleno de mañá.