O portavoz popular de Montes, José Manuel Balseiro, salientou a “incoherencia” da oposición” porque, despois de reclamar durante anos a participación neste debate, agora votan en contra da iniciativa

O PARLAMENTO GALEGO APROBA A INICIATIVA DO GRUPO POPULAR PARA IMPULSAR MEDIDAS DE MELLORA NA PREVENCIÓN E LOITA CONTRA OS INCENDIOS FORESTAIS

• O acordo insta ao Consello Forestal, en representación do sector, a elaborar un ditame que despois será debatido por todas as forzas políticas parlamentarias
• Balseiro salientou “o desprezo” dos grupos da oposición á sociedade, que demanda “menos partidismo e máis consenso”

Santiago, 20 de outubro de 2015.- O Parlamento de Galicia aprobou esta tarde a proposición non de lei do Grupo Popular dirixida a impulsar un debate sobre novas propostas e medidas de mellora no sistema de prevención e loita contra os incendios forestais.

O portavoz de Montes do Grupo Popular, José Manuel Balseiro, amosou a disposición ao consenso a través dunha proposta cunha dobre variable: en primeiro lugar, a elaboración dun ditame polo Consello Forestal que recollera estas propostas e, en segundo lugar, a remisión do devandito ditame ante o Parlamento de Galicia para que todas as forzas políticas sen exclusión puideran debatelo, emendalo ou melloralo.

NÉGANSE AO DEBATE QUE LEVAN DEMANDANDO ANOS

Balseiro salientou a incoherencia dos partidos da oposición que decidiron non apoiar este acordo, “a pesar de que levan anos reclamando precisamente participar neste debate e achegar ideas sobre a mellora do sistema contra incendios”. O voceiro popular acusou ás forzas da oposición de “desprezar” á sociedade galega que reclama, neste ámbito, “menos partidismo e máis consenso” e lamentou que pechasen as portas.

“É unha mágoa que as forzas da oposición non queiran participar. Quedaron retratados. Non queren un debate serio sobre incendios”, concluíu Balseiro.