Os deputados Jose Manuel Balseiro e Vidal Martínez Sierra aseguran que tanto PPdeG como o Goberno galego teñen o máximo interese e vontade para que a mina volva á actividade e se respecten os compromisos laborais cos traballadores

O GRUPO POPULAR APOIARÁ NO PARLAMENTO QUE A XUNTA ADOPTE AS MEDIDAS NECESARIAS PARA GARANTIR A ACTIVIDADE E O EMPREGO DA ANTIGA EMPRESA ECESA DE BURELA

• Sinalan que a día de hoxe o único escollo é que se está á espera de que a Xustiza mercantil resolva os recursos presentados para que a transmisión aos novos propietarios sexa firme e definitiva

Santiago, 20 de outubro de 2015.- Os deputados do Grupo Popular Jose Manuel Balseiro e Vidal Martínez-Sierra explicaron hoxe que a formación política á que pertencen apoiará un acordo na Comisión de Industria do Parlamento de Galicia, que se celebra mañá mércores, a través do que se insta á Xunta a adoptar todas as iniciativas que sexan precisas para garantir a continuidade da actividade e dos postos de traballo vinculados á empresa Área Mineira do Atlántico, isto é, a antiga ECESA de Burela.

Balseiro e Martínez-Sierra lembran que a empresa declarou concurso de acredores en marzo de 2014 e en decembro dese mesmo ano deu inicio o proceso de liquidación. Tras celebrarse a poxa de liquidación da compañía, hai un novo grupo mineiro adxudicatario provisional da propiedade (o Grupo SAMCA) que asumiu dous compromisos concretos: realizar un investimento de 10 millóns de euros nun prazo de entre 2 e 5 anos; e crear unha bolsa de emprego cos antigos traballadores da empresa, co compromiso de contratalos.

Os deputados do Grupo Popular queren que estas dúas opcións poidan facerse realidade o antes posible e recordan que a propia Xunta de Galicia comprometeuse a intervir, en apoio desta actividade e dos empregados, dentro das súas capacidades e competencias, “vontade que compartimos e á que instamos a realizar con urxencia”.

ÚNICO ESCOLLO: PENDENTE DE RESOLVER OS RECURSOS

Desde o Grupo Popular aclaran que o único escollo que queda é que a transmisión da empresa aínda non é firme, xa que restan por resolver varios recursos no xulgado do Mercantil. “Polo momento, temos que esperar eses pronunciamentos, pois determinarán de quen é a propiedade”, indican os deputados.

“Cando a adxudicación sexa firme, a Xunta deberá falar co propietario e os traballadores para servir de apoio á reactivación desta importante compañía”, manifestan. ADemis, Balseiro e Martínez-Sierra afirman que “tanto desde o Grupo Popular como tamén desde a Xunta de Galicia temos o máximo interese en que esta mina volva á actividade, e de aí que fagamos posible este acordo parlamentario, porque o seu produto segue a ter un grande prestixio internacional e de grande demanda pero, sobre todo, porque suporía recuperar un motor económico e de emprego na zona”.