O BNG está obrigado a dar explicacións aos lucenses

O secretario xeral dos populares lucenses empraza aos nacionalistas a explicar por que o seu código ético é distinto para a Deputación de Lugo que para o resto de Galicia

Balseiro di que o BNG está obrigado a aclarar aos lucenses se definitivamente desautoriza a Vence e non cumpren co veto a presenza de imputados no goberno provincial

Balseiro Orol, secretario xeral do PPdeLugo

  • Salienta a incoherencia do BNG que rompeu co goberno do exalcalde Orozco no Concello pero parece disposto a gobernar con ata tres imputados, a douscentos metros, no pazo de San Marcos

Lugo, 21 de setembro de 2015.- O secretario xeral do Partido Popular na provincia de Lugo, Jose Manuel Balseiro, valorou as declaracións efectuadas polo presidente da Deputación, Dario Campos, nas que confirma que os trece deputados do bipartito (os once do PSOE e os dous do BNG) terán responsabilidades no futuro Goberno provincial.

O dirixente popular asegura que o BNG, unha vez coñecida esta postura, esta obrigado a dar unha serie de explicacións aos lucenses, e moi en particular é inescusable que responda tres preguntas moi concretas:

A primeira, Balseiro empraza aos nacionalistas a aclarar se desautorizan definitivamente ao voceiro nacional do BNG, Xavier Vence, cando aseguraba que o BNG non compartiría goberno con imputados.

En segundo lugar, pregunta se o BNG pensa aplicar un código ético para a Deputación de Lugo distinto do que se está a aplicar en Galicia, no caso do lucense moito máis permisivo coa presenza de imputados

Finalmente Balseiro dixo que no BNG están obrigados a explicar como pode ser que no Concello de Lugo pediran a dimisión do exacalde Orozco por estar imputado e, a douscentos metros ao seu carón, no pazo de San Marcos, estean dispostos a compartir goberno con ata tres imputados do PSOE.