Balseiro acusa á oposición de empregar á flota do cerco só con intereses partidistas e di que lles interesa afondar na división dos seus profesionais para manter a polémica e obter réditos a curto prazo

O GRUPO POPULAR DEFENDE A VÍA DE DIÁLOGO ABERTA POLA XUNTA CO CONXUNTO DO CERCO GALEGO E CONVIDA Á OPOSICIÓN A SUMARSE CON PROPOSTAS CONSTRUTIVAS

• Felicitan aos distintos representantes da flota por apoiar a proposta deseñada pola Consellería do Mar a petición do propio sector que consiste en establecer unha “base mínima” de posibilidades de pesca para os barcos que non dispoñen de cota.

Santiago, 20 de xaneiro de 2016.- O voceiro do Mar do Grupo Parlamentario Popular, Jose Manuel Balseiro, defendeu hoxe a “vía de participación e diálogo” aberta pola Consellería do Mar co sector do cerco galego e convidou á oposición “a sumar propostas construtivas para esta flota”.

 Os populares apoian, deste xeito, a iniciativa do Goberno autonómico cando promoveu distintas xuntanzas para que “os representantes do cerco galego no seu conxunto e sen exclusións” busquen un acordo consensuado sobre o reparto de cota.

 En particular Balseiro felicitouse polas posicións favorables que os distintos representantes da flota adiantaron á proposta deseñada pola Xunta, a petición do propio sector, e que consiste en establecer unha “base mínima” de posibilidades de pesca para os barcos que non dispoñen de cota.

 Segundo o Grupo Popular esta acordo “permite superar unha escollo importante” e garante a actividade dos profesionais do cerco galego que disporán da asignación dun mínimo de toneladas de xurelo para cada barco en función do seu tamaño, a partires de 10.000 quilos para os máis pequenos (5 GTs).

 INTERESES PARTIDISTAS

Balseiro pronunciouse deste xeito no transcurso do debate dunha iniciativa do PSOE que, na Comisión de Pesca e Marisqueo do Parlamento de Galicia, foi rexeitada desde o PP porque volvía a pedir a retirada da Orde Ministerial que establece o plan de xestión para o Caladoiro Cantábrico Noroeste.

Os populares manteñen que, non existe o consenso suficiente para actuar deste xeito e indican que mudar o criterio de repartición actual da flota do cerco que combina as capturas históricas co reparto en función do número de tripulantes, para quedarse só con este último, prexudicaría á flota galega de cerco no seu conxunto.

En todo caso reclamou “responsabilidade” á oposición a quen acusou de persistir nunha estratexia que busca “empregar á flota do cerco só con intereses partidistas”. Para Balseiro si desde o PSOE, BNG e AGE non rectifican amosan que “só lles interesa afondar na división dos profesionais do cerco galego para manter a polémica e obter réditos a curto prazo”, algo que para nada ten que ver coa defensa dos intereses xerais da pesca galega.