O voceiro da área forestal, Jose Manuel Balseiro, lembra que a lexislación vixente xa contempla unha exención e beneficios fiscais para estas comunidades veciñais

O GRUPO POPULAR CUALIFICA DE SINSENTIDO QUE A OPOSICIÓN SOLICITE QUE AS COMUNIDADES DE MONTES VECIÑAIS NON PAGUEN O IMPOSTO DE BENS INMOBLES CANDO XA ESTÁN EXENTAS

• Balseiro apuntou que estas comunidades dispoñen dunha tributación especial no imposto de Sociedades, ata o punto de que non teñen que facer declaración naqueles períodos impositivos en que non obteñan ingresos ou poden desgravarse os investimentos realizados no propio monte

Santiago, 1 de abril de 2016.- O voceiro da área forestal do Grupo Popular, Jose Manuel Balseiro, considerou “un sinsentido” que toda a oposición apoiara hoxe unha proposición non de lei do BNG solicitando que as comunidades de montes veciñais non paguen o imposto de bens inmobles (IBI), “cando xa están exentas”. Neste sentido, defendeu a aplicación deste beneficio previsto na norma en consideración coa natureza e función social que desempeñan estas agrupacións forestais.

 Balseiro indicou que a propia normativa reguladora dos montes veciñais en man común cualifica estes bens como indivisibles, inalienables, imprescriptibles e inembargables, polo que, “sen espazo para a dúbida non están suxeitos a contribución algunha de base territorial nin á cota empresarial agraria”.

 IMPOSTO DE SOCIEDADES

 Situación similar acontece co imposto de Sociedades que, trala reforma operada en 2014 (Lei 27/2014, do 27 de novembro) a iniciativa do Partido Popular, establece un réxime particular de tributación especial para as comunidades de montes.

 En concreto, se lle recoñece unha serie de reducións da base impoñible do imposto e unha gran flexibilidade á hora de favorecer os investimentos no propio monte polos que teñen dereito a desgravarse o gasto realizado.

 Incluso a propia norma establece que as comunidades titulares de montes veciñais en man común non estarán obrigadas a presentar declaración por este Imposto naqueles períodos impositivos en que non obteñan ingresos.

 Precisamente por todas estas razóns o deputado popular asegurou que a oposición fixo o ridículo cando, na Comisión de Agricultura e Montes do Parlamento de Galicia que tivo lugar esta mañá, amosou o seu apoio a unha iniciativa do BNG que reclamaba unha exención e beneficios fiscais para estas comunidades de montes que as propias leis vixentes xa contemplan.