O voceiro do Mar, Jose Manuel Balseiro, lembra que o investimento dirixido a mellorar a calidade das augas ascende a 246 millóns, dos cales a Xunta achega 105 millóns

 O GRUPO POPULAR PON EN VALOR AS INICIATIVAS DA XUNTA PARA ACADAR O SANEAMENTO INTEGRAL E A REXENERACIÓN MARISQUEIRA DA RÍA DE FERROL

Xunta de Portavoces, 18-05-2016

• Lembrou que grazas a batea de reinstalación, que permite a depuración e comercialización de bivalvos procedentes de zonas C, a ría de Ferrol recuperou o nivel de capturas e vendas en fresco que se rexistraron antes dos peches
•  Anticipou tamén que a Consellería do Mar xa tramita a encomenda de xestión que permitirá impulsar de xeito inminente un plan de rexeneración do banco marisqueiro de As Pías en Ferrol

Santiago, 18 de maio de 2016.- O voceiro do Mar do Grupo Popular, Jose Manuel Balseiro, quixo poñer en valor as iniciativas impulsadas pola Xunta de Galicia para acadar o saneamento integral e a rexeneración marisqueira da ría de Ferrol.

O popular lembrou que durante os últimos anos tanto o Goberno autonómico como central realizaron importantes investimentos para dotala das infraestruturas necesarias dirixidas a mellorar a calidade das augas e a recuperar a capacidade produtiva.

Sinalou tamén que conseguir o saneamento integral da ría de Ferrol debe ser un esforzo conxunto e que todas as administracións, incluídas as municipais, deben estar plenamente implicadas polo que instou ás mesmas a ampliar os seus compromisos.

246 MILLÓNS DE EUROS EN INVESTIMENTOS

Balseiro citou varias obras, entre elas, a execución da estación depuradora para tratar as augas residuais, o emisario submarino para o vertido e o emisario terrestre para transportar as augas dende a ensenada da Malata ata a depuradora. Todas estas actuacións supuxeron unha inversión (só no marxe norte) de 108 millóns. Esta cifra ascende a 246 millóns se temos en conta todas as actuacións –e non só as da marxe norte- dirixidas a acadar o saneamento da ría de Ferrol, dos cales a Xunta aporta 105 millóns.

BATEA DE REINSTALACIÓN

O popular tamén defendeu a utilidade e funcionamento da batea de reinstalación de moluscos que permite a depuración e posterior comercialización daqueles mariscos producidos en espazos catalogados como zonas C.

Lembrou que grazas este sistema implantado no ano 2012, a ría de Ferrol recuperou no ano 2015 o nivel de capturas e vendas en fresco de bivalvos que se rexistraron no ano 2005, isto é, antes dos peches. Dixo tamén que o Goberno galego quere que a reinstalación non teña custe para as confrarías, e urxiu ao pósito de Ferrol a empregar o sistema utilizado polas confrarías de Pontedeume, Miño e Corcubión

PLAN DE REXENERACIÓN

Por outra banda anticipou que a Consellería do Mar ten previsto impulsar de xeito inminente un plan de rexeneración do banco marisqueiro de As Pías en Ferrol.

 De feito explicou que a administración autonómica xa tramita unha encomenda de xestión que dará continuidade aos traballos executados nesta zona no pasado e que inclúen, entre outras tarefas, a retirada do mexillón, control dos depredadores, achegas de area, a descompactación de substrato e o posible traslado de xuvenís.