A XUNTA FACILITARÁ A CONTRATACIÓN DE 20 PERCEPTORES DA RISGA POLO CONCELLO DE MONFORTE QUE REFORZARÁN DURANTE SETE MESES O CADRO DE PERSOAL MUNICIPAL
- O delegado territorial da Xunta, José Manuel Balseiro, explicou en rolda de prensa que o Goberno galego financia a totalidade dos custes salariais e de seguridade social destas persoas
- No caso particular do Concello de Monforte 12 traballadores formarán parte do programa de mantemento das zonas verdes, coidado de xardíns e atenderán o punto limpo, e 8 máis colaborarán no control de actividades culturais e de promoción económica que realice o concello
Monforte (Lugo), 11 de xullo de 2017.- A Consellería de Economía, Emprego e Industria subvencionará ao Concello de Monforte a contratación de 20 perceptores da Risga (da renda de integración social de Galicia) que, durante o prazo de sete meses, se encargarán de reforzar diversas tarefas de interese e utilidade social.
Así o explicou esta mañá o delegado da Xunta en Lugo, José Manuel Balseiro, en rolda de prensa na que tamén avanzou que a medida busca favorecer a inserción laboral destas persoas e evitar a súa cronificación nunha situación de exclusión
En concreto, o Goberno galego achega para este fin máis de 230.000 euros que servirán para financiar a totalidade dos custos salariais destas persoas (incluída a cotización a Seguridade Social)
“Serán 20 veciñas e veciños de Monforte os que grazas a esta iniciativa do Goberno galego, pasarán de percibir a Risga a obter un salario polo traballo satisfeito” – un feito que Balseiro quixo poñer en valor tanto no ámbito social como no relativo á oportunidade laboral que representa.
No caso particular de Monforte, 12 traballadores formarán parte do programa de mantemento das zonas verdes, coidado de xardíns e atenderán o punto limpo, e 8 máis colaborarán no control de actividades culturais e de promoción económica que realice o concello.
Os beneficiarios desta iniciativa serán aqueles perceptores da RISGA que estean inscritos no Servizo Público de Emprego de Galicia como demandantes non ocupados. Entre eles, terán preferencia aqueles que teñan asinado un proxecto de inserción de carácter laboral, conten con cargas familiares ou dispoñan de máis de 45 anos.
A xornada laboral desta vintena de traballadores deberá ser do 75 por cento e as condicións do contrato serán as establecidas no convenio laboral correspondente ao posto de traballo que desempeñan.
O delegado territorial do Goberno galego concluíu incidindo en que esta medida ten como obxectivo conseguir a inserción laboral e a mellora da empregabilidade dos colectivos máis vulnerables, partindo da premisa de que a mellor política social é o emprego.
