A primeira infraestrutura cultural da provincia

Poblicado o por

A XUNTA ORGANIZA ESTE VENRES UNHA XORNADA DE PORTAS ABERTAS PARA QUE OS LUCENSES POIDAN COÑECER O AUDITORIO

xornada de portas abertas.jpg

  • O delegado territorial de Lugo, José Manuel Balseiro, asistirá á apertura prevista para as 10.00 horas

Lugo, 20 de setembro de 2017.- A Delegación Territorial da Xunta celebrará este venres unha xornada de portas abertas para que os lucenses poidan coñecer o Auditorio de Lugo, a que está chamada a ser a principal infraestrutura cultural da nosa cidade unha vez se complete o proceso de equipamento.

Está prevista a apertura ás 10.00 horas e poderá ser visitado ata as 15.00 horas. O delegado territorial de Lugo, José Manuel Balseiro, asistirá á apertura e realizará un breve percorrido polas instalacións.

O acceso será libre e gratuíto para todos os cidadáns interesados, pero ademais foron expresamente convidadas asociacións veciñais e outros colectivos da cidade, para que coñezan as posibilidades que ofrece este espazo.

Na actualidade a Xunta está a ultimar o equipamento, para o que adiantou un investimento de 3,7 millóns de euros a través dun convenio de colaboración co Concello, polo que este exime á Administración galega do pago do IBI de cinco centros sanitarios de titularidade pública autonómica.

A construción do Auditorio de Lugo foi unha aposta da Consellería de Medio Ambiente e Ordenación do Territorio e constituíu unha das actuacións máis importantes do Plan hUrbe no apartado de equipamentos públicos, licitada por un importe de 20 millóns de euros. A Xunta tamén achegou os terreos, que eran propiedade do Instituto Galego de Vivenda e Solo.