A XUNTA DESTINOU NO PASADO ANO 5,7 MILLÓNS DE EUROS AO CONCELLO DE GUITIRIZ PARA IMPULSAR O SECTOR AGROPECUARIO E MELLORAR DOTACIÓNS E INFRAESTRUTURAS
- O delegado territorial da Xunta en Lugo, José Manuel Balseiro, subliñou o investimento de 450.000 euros en axudas sociais “no eido da igualdade, a inclusión e a dependencia”
Guitiriz (Lugo), 21 de xaneiro de 2019.- A Xunta de Galicia investiu no pasado ano 5,7 millóns de euros no concello de Guitiriz, en gran medida destinados a impulsar as explotacións agropecuarias, tanto con axudas directas como con actuacións para mellorar as infraestruturas rurais, nun municipio no que este sector é un piar económico fundamental.
Así o sinalou o delegado territorial de Lugo, José Manuel Balseiro, durante unha visita a Becín, en Parga, onde o Goberno galego financiou o arranxo dun camiño de 1,5 quilómetros que conecta este núcleo e os de Moeiro e Abeledo, ademais de servir de acceso a numerosos espazos de interese, histórico, artístico e natural do municipio. O camiño tamén soporta abundante tráfico pesado pola proximidade das canteiras.
Balseiro explicou que se investiron 384.600 euros en obras como o reforzo de dúas pontes en Buríz e Pígara, tarefas de conservación no río Requeixo, a sinalización de recursos turísticos, ou melloras de cortalumes, pistas forestais e camiños de titularidade municipal, entre outros. Polo que respecta ás axudas para os agricultores e gandeiros, sumaron neste concello 4,1 millóns de euros.
O delegado subliñou especialmente o investimento de 450.000 euros en axudas sociais, para o desenvolvemento de accións “no eido da igualdade, a inclusión social e a dependencia”.
Neste apartado, o Goberno galego financia integramente o servizo de axuda no fogar para persoas en situación de dependencia que presta o concello, sufraga programas municipais para colectivos vulnerables ou de fomento da conciliación, e concede a particulares axudas para sufragar prazas en residencias ou a atención no seu domicilio. Tamén achegou financiamento para a rehabilitación da antiga casa dos peóns camiñeiros con fin de destinala a centro de día para persoas maiores.
Igualmente, a Xunta apoiou con 44.700 euros a contratación de cinco persoas por parte do concello e con 36.000 euros a tres empresas do municipio para o desenvolvemento de actividades non agrarias e industrias de transformación e comercialización.
Balseiro lembrou que tamén se realizaron importantes investimentos nos centros educativos e no fomento da cultura e o deporte, máis de 171.000 euros, así como na atención ás emerxencias, 230.700 euros destinados ao Grupo de Emerxencias Supramunicipal (GES), Protección Civil ou efectivos para a prevención de incendios.
Por último, apuntou que o concello recibe da Xunta 350.600 euros a través do Fondo de Cooperación Local, “orzamento que pode destinar ás obras e servizos que considere prioritarios para os seus veciños e veciñas”.
O delegado concluíu lembrando que o investimento da Xunta no municipio supera nun 42 por cento o orzamento municipal total (que é de 3,3 millóns de euros). “O Goberno galego apoia de forma especial aos concellos rurais axudando a crear as condicións que permitan a dinamización económica e social e o establecemento de xente moza”, indicou.
